嗯晓得在外面发财的邵阳老乡，好久冒恰过盐菜里。
还记得盐菜是么子味么？
我是蛮多年冒恰到过正宗屋里盐菜里。
写果篇文章时，想起盐菜，边写口里边来嘎口水。
细前嘎屋里，菜园土里蛮多芥菜。
芥菜恰新鲜的有滴子苦，大四哈嗯大喜欢。
娘老子把芥菜扯回来，割嘎蔸篼。
放钉箍里，开水撩下，捞出来。
冷嘎，扭干，搓滴盐，摊开挂竹竿上，太阳底下晒到。
晒个两三天，收起，卷成砣，放坛子里铺到。
压紧压紧者，再放几调匙盐，撒匀撒匀。
把坛子倒过来，屁股朝上，口子朝下，铺盖子上。
再在盖子边边上倒滴水，把坛子封到。
过个两个月者，翻出来。
滴滴咸味，滴滴香味者，嗅到马上就来嘎食欲。
倒水，盐菜洗干净。
外头晒干放坛子里两个月，盐菜多多少少有滴沙子。
切成碎碎者，架四开炒。
盐菜两种恰法。
盐菜汤，干炒盐菜。
两样我哈喜欢。
炒法差嗯多，盐菜汤就是比干炒多两瓢水。
先放油，最好是茶油。
舍嗯得，猪油也要得。
油煎老，盐菜放进切，炒得嫩崩崩燥。
切两片生姜，青辣椒，青辣椒斜起切成条。
再加几粒花椒子，放滴滴水者，盖锅盖。
水煮得差嗯多里，放葱，再盖锅盖。
分把钟者，一间灶屋，香气飘飘。
嗯好意思，我又咽口水里。
撮出来，白米饭，拌盐菜，一次可以干三碗，恰起来奶味。
要是还有腊妞，丸子，鸡妞煮煎豆腐，就打盐菜汤。
汤里放滴滴丹牌味精，又香又甜又解油荤又下饭。
早几年回切经常恰得到。
果几年娘牙老嘎里，做得少嘎蛮多。
好嗯容易腌一坛子，离屋近的弟兄姊妹家先下手为强，抢的精光。
正月嘎在屋过年特意同牙娘港嘎，今年回切无论如何帮我留到。
明天打杂电话回切，看娘牙还记得冒杂。
",